Judg 5 | NdeIBE | STEP | Ngalolosuku uDibhora loBharakhi indodana ka-Abhinowami bahlabela ingoma le:

Judges 5

Ingoma KaDibhora

1 Ngalolosuku uDibhora loBharakhi indodana ka-Abhinowami bahlabela ingoma le:

2 “Lapho amakhosana ko-Israyeli esekhokhela, lapho abantu bezinikela ngokuzithandela – dumisani uJehova!

3 “Zwanini lokhu lina makhosi! Lalelani lina babusi! Ngizahlabelela kuJehova, ngizahlabelela; ngizahubela uJehova ihubo, uNkulunkulu ka-Israyeli.

4 “Awu Jehova, ekuqhamukeni kwakho eSeyiri, lapho usuka elizweni lase-Edomi, umhlaba wanyikinyeka, amazulu athululeka, amayezi athululela amanzi phansi.

5 Izintaba zazamazama phambi kukaJehova, yena owaseSinayi, phambi kukaJehova, uNkulunkulu ka-Israyeli.

6 “Ezinsukwini zikaShamgari indodana ka-Anathi, ezinsukwini zikaJayeli, imigwaqo yayideliwe; izihambi zithatha izindledlana ezimazombe.

7 Impilo yemakhaya ko-Israyeli yaphela, yaphela kwaze kwavela mina Dibhora, kwavela umama ko-Israyeli.

8 Kwathi sebekhethe onkulunkulu abatsha, impi yafika emasangweni edolobho, njalo akukho hawu kumbe umkhonto owabonakalayo phakathi kwezinkulungwane ezingamatshumi amane ko-Israyeli.

9 Inhliziyo yami ikanye lamakhosana ka-Israyeli, kanye labazinikela ngokuzithandela phakathi kwabantu. Dumisani uJehova!

10 “Lina eligada obabhemi abamhlophe, lihlezi ezihlalweni zenu zengubo, lani elihamba emgwaqweni cabangani

11 ilizwi labahlabeleli ezindaweni zamanzi okunathisa. Bahuba ngezenzo ezilungileyo zikaJehova, izenzo ezilungileyo zamabutho akhe ko-Israyeli. “Lapho-ke abantu bakaJehova behlela emasangweni edolobho.

12 ‘Vuka, vuka, Dibhora! Vuka, vuka, uhlabele ingoma! Vuka weBharakhi. Zithumbe izithunjwa zakho, we ndodana ka-Abhinowami.’

13 “Kwathi abantu ababesele bafika kubahlonitshwa; abantu bakaJehova beza kimi labalamandla.

14 Abanye bavela ko-Efrayimi, abamdabuko wabo use-Amaleki; uBhenjamini wayelabantu abakulandelayo. Izinduna zamabutho zavela eMakhiri, koZebhuluni labo abaphatha intonga yomlawuli webutho.

15 Amakhosana ako-Isakhari ayeloDibhora; yebo, u-Isakhari wayeloBharakhi emxhuma ngesiqubu esigodini. Ezifundeni zakoRubheni kwaba lokuhlolwa okukhulu kwezinhliziyo.

16 Lahlalelani ezihonqweni zomlilo ukuzwa amakhwelo enqanda izimvu na? Ezifundeni zakoRubheni, kwaba lokuhlolwa okukhulu kwezinhliziyo.

17 UGileyadi wahlala ngaphetsheya kweJodani. LoDani wasalelani ngasemikhunjini na? U-Asheri wasala ngasekhunjini wahlala emagobosini akhe olwandle.

18 Abantu bakoZebhuluni bafaka impilo yabo uqobo engozini; wenzanjalo loNafthali emiqolweni yeganga.

19 “Amakhosi afika, alwa; amakhosi aseKhenani alwa eThahanakhi ngasemachibini aseMegido, kodwa kawazathwala isiliva, lampango.

20 Izinkanyezi zalwa zisemazulwini, zalwa loSisera zisezindleleni zazo.

21 Umfula uKhishoni wabakhukhula, umfula wendulo, umfula uKhishoni. Phambili, mphefumulo wami; Qina!

22 Kwaduma amasondo amabhiza – ematha, ematha ehamba amabhiza akhe alamandla.

23 ‘Iqalekiseni iMerozi,’ kwatsho ingilosi kaJehova, ‘Baqalekiseni kabuhlungu abantu bayo, ngoba kabezanga ukuncedisa uJehova, ukuzasiza uJehova emelane labalamandla.’

24 “Kabe ngobusiswe kakhulu kwabesifazana uJayeli, umkaHebheri umKheni, obusiswe kakhulu kwabesifazana abahlala emathenteni.

25 Wacela amanzi, yena wamnika uchago, wamlethela amasi ngomganu ofanele abahlonitshwa.

26 Wathatha isikhonkwane sethente ngesandla sakhe, isandla sakhe sokudla sathatha isando somkhandi. Watshaya uSisera, wachoboza ikhanda lakhe, waphahaza wabhoboza inhlafuno yakhe.

27 Wawohlokela ezinyaweni zakhe, wawa; wabhazalala khonapho. Wawohlokela ezinyaweni zakhe wawa; lapho awohlokela khona, wawela khonapho esefile.

28 “UnakaSisera walunguza ngewindi; ngemuva kwewindi wanqolonga wathi, ‘Kungani inqola yakhe yempi iphuze kangaka ukufika? Kungani ukugodlozela kwezinqola zakhe zempi kuphuzile?’

29 Ohlakaniphe kakhulu kumakhosazana akhe wamphendula; impela yena uhlezi ezitshela esithi,

30 ‘Kanti kabafumani mpango bayabelane na; intombazana loba amabili indoda nganye, izigqoko ezimibalabala eziyimpango kaSisera, izigqoko ezimibalabala ezicecisiweyo, izigqoko eziceciswe kakhulu zentamo yami – konke lokhu kuyimpango?’

31 “Ngakho sengathi zingabhubha zonke izitha zakho, O Jehova! Kodwa sengathi labo abakuthandayo bangaba njengelanga lapho liphuma ngamandla alo.” Kwasekusiba lokuthula elizweni iminyaka engamatshumi amane.